வியாசர்பாடியைச் சேர்ந்த புகழ் பெற்ற 5 ரூபாய் டாக்டர் என அறியப்படும் மருத்துவர் திருவேங்கடம் வீரராகவன் காலமானார். அவருக்கு வயது 70.
கடந்த 40 ஆண்டுகளுக்கும் மேலாக எருக்கஞ்சேரியிலும், வியாசர்பாடியிலும் தன்னை நாடி வரும் நோயாளிகளுக்கு சிகிச்சை அளித்துவிட்டு, சிகிச்சைக்கான கட்டணமாக 5 ரூபாய் மட்டுமே வாங்கிக் கொள்வார். 70 வயதான மருத்துவர் திருவேங்கடம் வீரராகவன் நேற்று நள்ளிரவில் மாரடைப்பால் உயிரிழந்தார்.
இவர் 1973-ல் ஸ்டான்லி மருத்துவமனையில் இலவசமாக மருத்துவம் பயின்றதால், மக்களுக்கு இலவசமாகவே சிகிச்சை அளிக்க வேண்டுமென விரும்பி, முதலில் 2 ரூபாய்க்கு வைத்தியம் பார்த்து வந்தார். பிறகு அவர் 5 ரூபாய் கட்டணத்தில் சிகிச்சை அளித்து வந்துள்ளார்.
விஜயின் மெர்சல் படத்தில் வரும் 5 ரூபாய் டாக்டர் என அறியப்படும் அந்த கேரக்டரின் முன்மாதிரியாக இவர்தான் உண்மையில் இருந்துள்ளார்.
இவரது மறைவிற்கு திமுக தலைவர் ஸ்டாலின் தனது ட்விட்டர் பக்கத்தில் தெரிவித்துள்ள இரங்கல் செய்தியில், “2 ரூபாயில் இருந்து 5 ரூபாய்க்கு மட்டுமே சிகிச்சை பார்த்த ‘மக்கள் டாக்டர்’ மருத்துவர் திருவேங்கடம்” என அந்த செய்தியில் குறிப்பிட்டு தனது இரங்கல் செய்தியினைத் தெரிவித்துள்ளார்.
வடசென்னையில் வெறும் 2 ரூபாய்க்கு மருத்துவ சிகிச்சை அளிக்கத் தொடங்கி தன் வாழ்நாளில் அதிகபட்சமாக ரூ.5 மட்டுமே சிகிச்சை கட்டணமாகப் பெற்றவர் ‘மக்கள் டாக்டர்’ திருவேங்கடம்!
எளிய மக்களின் உயிர் காக்கும் அன்பிற்குரிய மருத்துவராக விளங்கிய திருவேங்கடம் அவர்களின் மறைவுக்கு ஆழ்ந்த இரங்கல். pic.twitter.com/CWHq8tCtUu
— M.K.Stalin (@mkstalin) August 16, 2020
மேலும் தொடர்ந்து, இவரது மறைவிற்கு தமிழக முதலமைச்சர் எடப்பாடி பழனிச்சாமி இரங்கல் தெரிவித்துள்ளார். அதில், “மருத்துவர் திருவேங்கடம் வீரராகவன் இறப்பு மிகுந்த வேதனையை ஏற்படுத்துகிறது, பொது மக்களுக்கும், சாதாரண மக்களுக்கும் வெறும் 5 ரூபாயில் சிகிச்சை அளித்து வந்த பெருமைக்குரியவர். இவரின் இழப்பு ஈடு செய்ய முடியாதது” என முதலமைச்சர் எடப்பாடி பழனிச்சாமி இரங்கல் செய்தியில் தெரிவித்துள்ளார்.
