விஜய்யின் அடுத்த படத்தின் இயக்குனர் இவர்தான் – மீண்டும் குடும்ப செண்ட்டிமெண்ட் கதையில் தளபதி !

விஜய்யின் அடுத்த படத்தின் இயக்குனர் இவர்தான் – மீண்டும் குடும்ப செண்ட்டிமெண்ட் கதையில் தளபதி !

விஜய் நடிக்கும் அவரது அடுத்த படமான தளபதி 65 –ஐ இயக்குனர் பாண்டிராஜ் இயக்கப்போவதாக அறிவிப்புகள் வெளியாகியுள்ளன.

விஜய்யின் 64 ஆவது படமான மாஸ்டர் படம் கோடை விடுமுறையை முன்னிட்டு ஏப்ரல் மாதம் திரைக்கு வர இருக்கிறது. இதையடுத்து விஜய்யின் 65 ஆவது படத்தை சன் பிக்சர்ஸ் தயாரிக்க இருப்பதாக அறிவித்துள்ளது. அந்த படத்தின் இயக்குனர் என்பது பற்றி இதுவரை அறிவிக்காத நிலையில் இப்போது அதுபற்றிய தகவல் வெளியாகியுள்ளது.

விஜய் தனது ஆரம்பகால சினிமா வாழ்க்கையில் அதிக அளவில் குடும்ப கதையம்சம் கொண்ட படங்களில் நடித்துள்ளார். அதன் பின்பு ஆக்ஷன் வரூட்டில் நுழைந்த பின்பு அவர் குடும்பக் கதைகளில் நடிப்பதைக் குறைத்துக்கொண்டார். தற்போது மீண்டும் ஒரு குடும்ப கதையில் நடிக்க விருப்பப்படும் அவர் இதற்காக இயக்குனர் பாண்டிராஜைத் தேர்வு செய்துள்ளதாக சொல்லப்படுகிறது. கடைக்குட்டி சிங்கம்,  நம்ம வீட்டு பிள்ளை ஆகிய படங்களின் மூலம் குடும்ப ஆடியன்ஸ் தியேட்டருக்கு இழுக்கும் இயக்குனராக வலம் வந்து கொண்டிருக்கிறார்.

ஏற்கனவே இவர் சன் பிக்சர்ஸ் தயாரித்த நம்ம வீட்டு பிள்ளை படத்தை இயக்கி வெற்றி படமாக்கிக் காட்டினார். அந்த வகையில் சன் பிக்சர்ஸ், விஜய் நடிக்கும் அடுத்த படத்தை இயக்க பாண்டிராஜை பரிந்துரைத்துள்ளது. இதை அடுத்து பாண்டிராஜிடம் கதை கேட்ட நடிகர் விஜய் அந்த கதை பிடித்துள்ளதாக கூறியதாகவும் அடுத்த படமாக இதையே நடிக்க முடிவு செய்துள்ளதாகவும் சொல்லப்படுகிறது.

பசங்க படம் மூலம் தமிழ் சினிமாவிற்கு அறிமுகமான பாண்டிராஜ் அதன் பின்னர் வம்சம், மெரினா, பசங்க 2, இது நம்ம ஆளு, கதகளி, கடைக்குட்டி சிங்கம்  மற்றும் நம்ம வீட்டு பிள்ளை ஆகிய படங்களை இயக்கியவர் என்பது குறிப்பிடத்தக்கது.