எதிர்பார்ப்பை ஏற்படுத்தி இருக்கும் பா ரஞ்சித்தின் நட்சத்திரம் நகர்கிறது… டிரைலர் எப்போது?
பா ரஞ்சித் இயக்கியுள்ள நட்சத்திரம் நகர்கிறது திரைப்படம் ஆகஸ்ட் 31 ஆம் தேதி ரிலீஸ் ஆகிறது.
சார்பட்டா பரம்பரை படத்தின் வெற்றிக்குப் பிறகு இயக்குனர் பா ரஞ்சித் தற்போது நட்சத்திரம் நகர்கிறது என்ற காதல் கதையை இயக்கியுள்ளார். இந்த படத்துக்காக பல புதுமுகங்களை அவர் பயன்படுத்தியுள்ளார். வழக்கமாக தன் படங்களில் பணிபுரியும் கலைஞர்களுக்கு பதில் புதுமுக கலைஞர்களை அதிகளவில் பயன்படுத்தியுள்ளார். காதல் கதையில் அரசியல் சார்ந்து இந்த படத்தை இயக்கியுள்ளதாக அவர் தெரிவித்துள்ளார்.
இந்த படத்தின் போஸ்டர்கள் மற்றும் கதாபாத்திர அறிமுக போஸ்டர்கள் வெளியாகி இணையத்தில் கவனம் பெற்றன. வரும் ஆகஸ்ட் 31 ஆம் தேதி திரையரங்குகளில் வெளியாகும் என அறிவிக்கப்பட்டுள்ளது. அதற்கு முன்பாக படத்தின் டிரைலர் மற்றும் பாடல்கள் ஆகியவை வெளியாகும் என எதிர்பார்க்கப்பட்ட நிலையில் இன்று மாலை டிரைலர் வெளியாகும் என அறிவிக்கப்பட்டுள்ளது. இந்த படத்தின் மீதான எதிர்பார்ப்புகளுக்கு தீனி போடும் வகையில் இந்த டிரைலர் அமையும் என எதிர்பார்க்கப்படுகிறது.
பா ரஞ்சித் 2012ம் ஆண்டு இவர் இயக்கிய அட்டகத்தி திரைப்படம் மூலம் இவர் இயக்குனராக அறிமுகம் ஆனார். அதன் பின்னர் அவர் இயக்கிய மெட்ராஸ், கபாலி மற்றும் சார்பட்டா பரம்பரை ஆகிய படங்கள் மிகப்பெரிய வெற்றியையும் பாராட்டுகளையும் பெற்றன. இதற்கிடையில் அவர் தன்னுடைய தயாரிப்பு நிறுவனமான நீலம் புரொடக்ஷன்ஸ் என்ற நிறுவனத்தையும் தொடங்கி தரமான படங்களையும் தயாரித்து வருகிறார்.
