இது எங்க ஏரியா!வொயிட்வாஷ் செய்து பழிதீர்த்த நியுசிலாந்து!

0
69

நியுசிலாந்து சென்றுள்ள இந்திய அணி அங்கு 5 டி 20 போட்டிகள் மற்றும் 3 ஒருநாள் போட்டிகள் கொண்ட தொடரில் விளையாடி வருகிறது. இதில் நடந்து முடிந்த 5 டி20 போட்டிகளிலும் இந்திய அணி வெற்றி பெற்று 5-0 என்ற கணக்கில் வெற்றி பெற்று தொடரைக் கைப்பற்றியுள்ளது.

ஆனால் அதன் பின் தொடங்கிய ஒருநாள் தொடர் இந்திய அணிக்கு மகிழ்ச்சி அளிக்கும் விதமாக இல்லை. நடந்து முடிந்த இரு போட்டிகளிலும் இந்திய அணி தோல்வி அடைந்து தொடரை இழந்துள்ளது. இன்று பே ஓவல் மைதானத்தில் நடைபெறும் மூன்றாவது போட்டியிலாவது ஆறுதல் வெற்றி பெறுமா என்ற ஏக்கம் ரசிகர்கள் மனதில் எழுந்தது.இன்று காலை தொடங்கிய போட்டியில் டாஸ் வென்ற நியுசிலாந்து கேப்டன் வில்லியம்சன் இந்தியாவை பேட் செய்ய பணித்தார். அதை அடுத்து களமிறங்கிய இந்திய அணியில் தொடக்க ஆட்டக்காரர் மயங்க் அகர்வால் 1 ரன்னில் அவுட் ஆகி ஏமாற்றம் அளித்தார். பின்னர் வந்த கேப்டன் கோலி 9 ரன்களில் ஆட்டமிழக்க இந்திய அணி இக்கட்டான சூழலில் உள்ளது.

அதன் பின்னர் ஸ்ரேயாஸ் மற்றும் ராகுல் ஜோடி அணியை தூக்கி நிறுத்தினர். சிறப்பாக விளையாடிய ஸ்ரெயாஸ் ஐயர் 62 ரன்கள் சேர்த்து ஆட்டமிழந்தார். அதன் பின்னர் மனிஷ் பாண்டேவுடன் ஜோடி சேர்ந்த ராகுல் சிறப்பாக விளையாடி சதமடித்தார். இதனால் இந்திய அணியின் ஸ்கோர் உயர்ந்தது. மனிஷ் பாண்டே 42 ரன்கள் சேர்த்தார். இதன் மூலம் இந்திய அணி 50 ஓவர்களில் 7 விக்கெட் இழப்புக்கு 296 ரன்கள் சேர்த்தது.

இதையடுத்து களமிறங்கிய நியுசிலாந்து பேட்ஸ்மேன்கள் தொடக்க ஆட்டக்காரர்கள் சிறப்பானத் தொடக்கத்தை அமைத்துக் கொடுத்தனர். கப்தில் 61 ரன்களும் நிக்கோல்ஸ் 80 ரன்களும் சேர்த்து அவுட் ஆகினர். அதன் பின்னர் வந்த வில்லியம்ஸன் 21 ரன்களிலும் ராஸ் டெய்லர்(12), லாதம் (32) நீஷம் (32) ரன்களும் எடுத்து சீரான இடைவெளியில் அவுட் ஆகி வெளியேறினார். அதனால் வெற்றி வாய்ப்பு பாதிக்குப் பாதியாக இருந்தது. ஆனால் அந்த அணியின் காலின் டி கிராண்ட்ஹோம் இந்திய அணியின் ஒட்டுமொத்த நம்பிக்கையையும் சுக்கு நூறாக்கினார். அதிரடியாக விளையாடிய அவர் 28 பந்துகளில் 58 ரன்களை சேர்த்து 48 ஆவது ஓவரிலேயே வெற்றி இலக்கை எட்ட வைத்தார். இதன் மூலம் அந்த அணி 5 விக்கெட் வித்தியாசத்தில் வெற்றி பெற்றது.

டி 20 தொடரில் தங்கள் சொந்த மண்ணில் வொயிட் வாஷ் ஆகி பட்ட அவமானத்தை ஒருநாள் தொடரின் மூலம் போக்கியுள்ளது நியுசிலாந்து அணி.

author avatar
Parthipan K