மக்களவை தேர்தலில் தமிழகத்தில் போட்டியிடும் கோடீஸ்வர வேட்பாளர்கள்

தமிழகத்தில் நடைபெறவிருக்கும் மக்களவைத் தேர்தலில் 4 பில்லியனர்கள், அதாவது நூறு கோடிக்கும் மேல் சொத்து வைத்திருக்கும் கோடீஸ்வரர்கள் போட்டியிடுகின்றனர். இவர்கள் தாக்கல் செய்திருக்கும் வேட்புமனுக்கள் மூலம் இது தெரிய வந்துள்ளது.

தமிழகத்தில் வரும் ஏப்ரல் 18ஆம் தேதி மக்களவை தேர்தல் மற்றும் 18 சட்டமன்ற தொகுதிகளுக்கான இடைத்தேர்தல் நடக்கிறது. இந்தத் தேர்தலுக்கான வேட்புமனு தாக்கல் நேற்றுடன் முடிந்து, இன்று வேட்பு மனுக்கள் சரிபார்ப்பு நடந்து வருகிறது. திமுக, அதிமுக தலைமையில் இரண்டு மெகா கூட்டணிகள் இந்தத் தேர்தலில் மோதுகின்றன.

திமுக, அதிமுக சார்பில் போட்டியிடும் வேட்பாளர்களில் நூறு கோடிக்கும் மேல், அதாவது பில்லியனர்கள் என்று அழைக்கப்படும் கோடீஸ்வரர்கள் 4 பேர் இந்த முறை போட்டியிடுகின்றனர். இந்த தகவல் இவர்கள் தாக்கல் செய்த வேட்புமனுக்கள் மூலம் தெரிய வந்துள்ளது.

வேட்பாளர்கள் ஏ.சி. சண்முகம் (அதிமுக), எஸ். ஜெகத்ரட்சகன் (திமுக), ஹெச். வசந்தகுமார் (காங்கிரஸ்), மகேந்திரன் (மநீதி) ஆகியோர் நூறு கோடிக்கும் மேல் சொத்து வைத்துள்ளனர். இவர்களில் முதல் இடத்தில் இருப்பவர் வசந்தகுமார். அவரது சொத்து மதிப்பு ரூ. 417.49 கோடி. மகேந்திரன் ரூ. 133.30 கோடிகளுடன் இரண்டாம் இடத்தில் உள்ளார். ஏ.சி. சண்முகம் ரூ. 125.83 கோடிகளுடன் மூன்றாம் இடத்திலும், ஜெகத்ரட்சகன் ரூ. 114.69 கோடிகளுடன் நான்காம் இடத்திலும் உள்ளனர்.

தொழிலதிபராக இருக்கும் வசந்தகுமாருக்கு சொந்தமாக வீட்டு உபயோகப் பொருட்கள் விற்கும் நிறுவனம் உள்ளது. மேலும் டிவி சேனல் நடத்தி வருகிறார். நாங்குநேரி எம்.எல்.ஏ., வாக இருக்கிறார். வனிலா பயிர் செய்து வருபவர் மகேந்திரன். வெளிநாடுகளுக்கும் ஏற்றுமதி செய்து வருகிறார். வனிலா பயிர் இவரது கனவு திட்டம் என்று கூட கூறலாம். ஏ.சி சண்முகம் டாக்டர் எம்.ஜி.ஆர்., பல்கலைக்கழகத்தின் நிறுவனராக இருக்கிறார். ஜெகத்ரட்சகன் தமிழகத்தில் பல்வேறு பொறியியல், மருத்துவக் கல்லூரிகளை நடத்தி வருகிறார். மேலும் சிங்கப்பூர், இலங்கையில் வர்த்தகத்தில் ஈடுபட்டு வருகிறார். கோடீஸ்வர வேட்பாளர்களுக்கு தமிழகமும் சளைத்தது அல்ல என்பதை இவர்கள் நிரூபித்துள்ளனர்.